Rikirake n Tamnei (#10427)

Au Uea!  Karaoa Tamaroam bwa kanau, ao ike iai Ngkoe iai bwa nimau, ao Kukureim bwa au kaantaninga, ao Neboam bwa au mwakuri, ao Ururingam bwa raraou, ao mwaakan Ebiebim n tautaeka bwa te tia buokai n tain kainnanou, ao Mweengam bwa mweengau, ao au tabo ni maeka bwa te tekateka are Ko a tia ni katabua ni kamwaawaa man tiia ake a katokaaki i aoia naake a kainaki i tinaniku kaanga ai aron te rabunanimata Mairoum. 
Ngkoe, ni koaua, te Kabanea ni Korakora, te Kabanea ni Mimitong, Moan te Mwaaka.

-Bahá'u'lláh
-----------------------

Rikirake n Tamnei (#10428)

Kamooai, O Ngkoe Atuau,  man karewen boiararan karaangan Am aki tootoki, ao katauai bwa Nna katoonga uanikain oioin Arom, O Ngkoe au Kaantaninga! Man itiakin nein Am tangira katauai bwa Nna nimma, O Ngkoe au Mimitong, ao kataua i bukiu bwa Nna maeka i aan nuun Am tabo ni kamanomano ae akea tokina O Ngkoe Ootau! Karikai bwa Nna aiwaa i nanon tawaanan Kaaniam, are bon i Matam, O Ngkoe are I rangi n tangiria, ao katekatekaai i angatain kaintokanuean Am nanoanga, , O Ngkoe are I nano Irouna! Kataua te ikeike bwa e na riaou man boiararan angin nako Kukureim, O Ngkoe au Katoki, ao katauai nakon rietan nako Baretaitin Oioim, O Ngkoe are I kamoamoaa! Katauai bwa Nna ongo tangin bwanaan nako Taoben Arom ae ti teuana, O Ngkoe te Oota-mwaaka, ao rinanon tamnein Mwaakam ao Korakoram kamaiuai, O Ngkoe te Tia Kakatauraoi i bukiu! Karikai bwa Nna teimatoa n tamnein Am tangira, O Ngkoe te Tia Kateimatoa, ao kamatoai waeu i nanon kawain Nanom are Ko tangiria.  O Ngkoe are Ko karikai! Kataua bwa Nna maeka n akea tokina i nanon onarokan Arom n tamnei, i bon Matam, O Ngkoe are Ko bon nananoangaai, ao kateiraoai i aon kaintokan Mimitongim, O Ngkoe are te Tia Bwainai ni koaua! Tabekai rake nakon karawan Am tangira n aakoi, O Ngkoe te Tia Kamaiu, ao n Itoin Ngainan Am kairiiri kairiirai O Ngkoe are I matennanoia! Weteai bwa Nna mena i mwaain kaotiotan nako Arom n tamnei are a aki nooraki, O Ngkoe are Rikiau ao rietaatan are I kainnanoia, ao karikai bwa Nna manga oki nakon oioin boiararan Tamaroam are Ko na bon kaotiotia, O Ngkoe are bon Atuau!
Ko bon mwaaka ni karaoa are Ko nano iai.  Boni Ngkoe, ni koaua, te kabanea n Rine, te Kabane ni Mimitong, te Kabane n Rietaata.

-Bahá'u'lláh
-----------------------

Rikirake n Tamnei (#16127)

Man karewen boiararan raangan Am aki tootoki anganai bwa nna mooi, O Atuau, ao man uaan kain Maium kariaia bwa Nna katoonga, O Ngkoe au Kaantaninga! Man itiakin nein Am tangira katauai bwa Nna nimma, O au Mimitong, ao iaan nuun Am kamanomano ae akea tokina kariaia bwa Nna maeka, O Ootau! Inanon tawaanan Kaaniam, are bon i Rarikim, karikai bwa Nna kona n aiwaa, O au Tangiria, ao i angatain kaintokanuean Am nanoanga, katekatekaai, O Matennanou! Man boiararan angin nako Kukureim kariaia te ikeike bwa e na riaou, O au Kouru, ao nakon rietan bwaretaitin Oioim, anganai te kariaia bwa nna rinnako, O are I Mamateakiniko! Nakon eenikunan Taoben Arom ae ti teuana Katauai bwa Nna kakauongo nako iai, O Ngkoe ae Ko Otamwaaka, ao rinanon tamnein Mwaakam ao Korakoram kamaiuai, O te Tia Kakatauraoi ibukiu! N angintamnein Am tangira kawakinai bwa nna teimatoa, O te Tia Kateimatoai, ao inanon kawain kukurein Nanom kamatoai mwanekan waeu, O te Tia karikai! Inanon onarokan Maium ae akea tokina, i Moam, kariaia bwa nna maeka iai n aki toki, O Ngkoe are Ko  nanoangaai, ao iaon kaintokan Mimitongim kateiraoai, O Ngkoe are te Tia Bwainai! Nakon karawan Am tangira n akoi mwemwekairake, O te Tia Kamaiuai, ao nakon Itoiningainan Am kairiiri kairai, O Ngkoe are au Tia Katiitika! I matan kaotiotin Tamneim ae e raba weteai bwa Nna roko iai, O Ngkoe Oioiu ao au Kantaninga ae te Kabanea n Rietaata, ao nakon oioin boiararan Tamaroam are Ko na bon kaotiotia, karikai bwa Nna manga oki, O Ngkoe Atuau!
Ko bon mwaaka ni karaoa are Ko nano iai.  Boni Ngkoe, ni koaua, te kabanea n Rine, te Kabanea ni Mimitong, te Kabanea n Rietaata.

-Bahá'u'lláh
-----------------------

Rikirake n Tamnei (#16128)

Karika nanou ae e itiaki, O Atuau, ao kabooua au iango ae e rau inanou, O au Kantaninga! Rinanon tamnein te korakora Ko na kamatoaai inanon Am Aro, O Moan Au Tangira, ao n otan Mimitongim kaota nakoiu te kawai, O Ngkoe Kourun Nanou! Rinanon korakoran Mwaakam ae e rianako iaon bwaai nako mwemwekairake nakon karawan Tabum, O Boton maiuu, ao n taian ang aika a aabebete n Am aki tootoki kakukureiai, O Ngkoe are Ngaia Atuau!  Kariaia taian eenikuuna aika akea tokiia n ikeikena te rau nako aou, O Iriau, ao kariaia kaubwain Moam ae mangkoa ae e aki tootoki ni kamwawaai man bwaai nako ma ti Ngkoe, O au Mwatita, ao kariaia rongorongon kaotiotin Am Oioi ae e aki maamate ni uota te kukurei nakoiu, O Ngkoe are Ngaia moan te noraki ibuakoia ake a noraki ao te kabanea n raba ibuakoia ake a karabaaki!

-Bahá'u'lláh
-----------------------

Rikirake n Tamnei (#16129)

Ko na kamimitongaki Ngkoe, O te Uea Atuau! I Anganiko te karabwarabwa ngkai Ko a tia ni Karikai n Am bong aikai, ao ni karinna inanou Am tangira ao Am atatai. I Bubuti Nakoim, n Aram ike bwaeao aika a tamaroa ni Wanawanam ao Am taetaenikawai a kaotinakoaki ma ibuakon kaubwain nanoia naake Am toro ake a kaan Nakoim, ao rinanon are Itoiningainan Aram, te Nanoanga, e a tia ni kaotaanako raneaneana iaoia nikabane ake n Am karawa ao iaon Am aonnaba, ni kanoaaki, n Am tituaraoi ao Am akoi, ma am bwain n akoi aika a kamimi ao n raba.
Aikai moan bongin maiu, O Atuau, are Ko a tia ni katomaa ma oin Am bong. Ngkai Ko a tia n anga nakoiu te karine ae moan te kakannato, tai taua mai irou bwaa ake Ko a tia ni katauii ibukiia naake Ko a tia n rineia.
Bon ngai, O Atuau, bon ti te ati ae e bingiingii are Ko a tia n unikia inanon tanon Am tangira, ao ni karikia bwa e na bwebwerake ma ni bain Am akoi. Te ati aio e bwarua, ngkanne, I kabin nanona, ibukin ranin Am nanoanga ao koburaken ranin kamaiun Am tituaraoi. Karuoa ngkanne nako aona, man karawan Am tangira n akoi, te bwai are e na karekea angana n rikirake iaan Nuum ao inanoaan tian Am oo ae e tabu. Ngkoe ni koaua Teuare E tebokii nanoia nikabane ake a tia ni Kinako man Am raanga n ran ae e raanganako ao te koburakenran n Am ran ni kamaiu.
E na neboaki te Atua, Uean te aonnaba.

-Bahá'u'lláh
-----------------------

Rikirake n Tamnei (#16130)

E na kamoamoaaki Aram, O te Uea Atuau! Ko nora arou ngkai I a tia n rairaki Nakoim, ao ni katea moau ni kaineti Am tituaraoi ao Am bwaintangira. I bubuti Nakoim, n Aram ao rinanon are Ko a tia ni karekea te angaraoi nakoia nikabane ake a tia ni kinaa Am katiteuana bwa a na katomamiia wainin Am nanoanga, ao nikabane ake a tia ni katikaki ni kaainaki Nakoim bwa a na moi man ranin kamaiun Am tangira n akoi, ni kamwawaai n tabwaninna man taian iango aika akea nanoia, ao ni kararaai bwa nna kaineta Am tituaraoi, O Ngkoe are Ueaia aomata nikabane!
N Am tituaraoi buokai, O Atuau, inanon bongin Kaotiotin Am Waaki ao Bonginaumarin Am Kaotioti, n raebitii taian rabunanimata ake a tia n tuukai man Kinaakim, ao man katebonakoaia inanon marawan Am atatai. Tauai Ngkoe ni bain Mwaakam, ao kariaia bwa nna kona ni uotakinakoaki ni karewen eenikunan Taoben Am katiteuana, bwa nna toki n iangoi moamoa nako inanon te karikibwai ae e bwanin ma bon ti Moamoam, O Ngkoe are Kourun nanou, ao ni kinaa te aonnaba ae e nonoraki akea riki ma bon ti kanikinaean Mwaakam, O Ngkoe are Atuan te nanoanga!
Ngai bon te karikibwai ae akea arona, O au Uea, ao Ngkoe bon te Tia Bwaibwai ni bwaai nikabane, te Kabanea n Rietaata; ao ngai bon kabanea ni ngore, ao Ngkoe bon te kabanea ni Korakora, ao te Tia Anga te Tua ae Moanbaan te Rietaata ni uaitera bwa mai moana ao n te toki. Tai taua mai irou boiararan Am Kaotioti, ao tai kamaenikuna au kantaninga ibuakon bwaronako ake a tia ni karaoaki mai karawan Am bwaintangira. Kataua Ngkoe ibukiu, O Atuau, raoiroin te aonnaba aio ao te aonnaba ae e na roko, ao kariaia ibukiu te bwai are e na uaana nakoiu ao ni katoai nako aonnaban Am aonnaba, bwa I bon aki ataa te bwai ae e na buokai ke ae e na kaikoakai. Ngkoe, ni koaua, te Kabanea n Ataibwai, te Kabanea ni Wanawana.
Kaota te nanoanga, ngkanne, O Atuau, nakoia Am toro ake a bwabwa inanon nuukan marawan taian kaoti aika a riaboro, ao kamwawaia ni mwaakan Ueam, O Ngkoe are Uean aara nikabane aara ao anua nikabane! Ngkoe bon Teuare Ngaia man te aki tootoki Ko a tia ni kataua te bwai are e Kakukureiko, ao E na bon ni karokoa te aki tootoki n teimatoa n aron naba anne. Akea riki te Atua bwa ti Ngkoe, te Tia Kabwaraibuure, te Kabanea n Nanoanga.

-Bahá'u'lláh
-----------------------

Rikirake n Tamnei (#16131)

Ko kamimitongaaki Aram, O te Uea Atuau, ike kain te onaroka n Am kaotioti a tia ni kaonaki ma te maiureirei, ao ni kona ni kaotinakoi uaan te katabuaki n tain te Aumari aio ngke karewen katomamin are Ko nano iai ao Am kakabwaia a tia ni kakiaaki iaon bwaai nikabane, ao ni karikiia bwa a na kaotinakoi bwaai nikabane ake a tia ni kaman katauaki ibukiia inanon Abanuean Am kaetieti ae e aki kona ni kaitaraaki ao Karawan oioin Am waaki ae e aki kona ni katokaki. I bubuti Nakoim n te Ara naba aio bwa Ko na aki karawawataaki bwa nna raroanako man oon Am katabuaki, ke ni kamwawaaki man Am katiteuanaaki ao kateuana ae e karietaaki katabuana.
Kakiaa, ngkanne, O Atuau, inanon bwanibwaniu ain Am tangira, bwa urana e na kabuekinako bwaai nako ma ti au urururing Ibukim, bwa nikabane tanetanen nako te babakanikawai e na kona n tiringaki n tabwaninna inanou, ao bwa akea ae e na tiku ma bon ti kamimitongaakin Arom ae e rietaata ao nikabane ni mimitong. Aio au kantaninga ae te kabanea n rietaata, ingaingan nanou, O Ngkoe ae Ko tautaekanii bwaai nako, ao inanon Baim bon abanuean te karikibwai ae e bwanin. Ngkoe, ni koaua, Ko karaoa are Ko rineia. Akea te Atua riki Irarikim, te Kabanea ni Mwaaka, te Kabanea ni Mimitong, te Kabanea n Nanoanga.

-Bahá'u'lláh
-----------------------

Rikirake n Tamnei (#10429)

Atuau!  Atuau!  Am toro aei, e a tia ni waaki Nakoim, n nanomatoa n tiotio nako n rereuan Am tangira, n nakonako ni kawain Am waaki, ni kakaantaninga Nanom, ni kariaria Am bwaintituaraoi, n onimakina Abanueam, ao ni kakukureiaki ni wainin Am bwaintangira.  Atuau!  Kamwaita karakaan arona n Am kananomatoa, ao karauakia n Neboam ao ingaingana n Am tangira.  
Ni koaua, Bon Ngkoe Moan te Raoiroi are E onrake ni bwaaintituaraoi aika a kakannato!  Bon akea Te Atua bwa ti Ngkoe, te Tia Kabwarabure, ao te Nanoanga.

-`Abdu'l-Bahá
-----------------------

Rikirake n Tamnei (#16132)

O au Uea! O au Uea! Aio te taura ae e kaotaaki n ain Am tangira ao ni kauraaki ma te ai are e kauraaki inanon kain Am nanoanga. O au Uea! Karakaa riki urana, aabuena ao aina, ma te ai are e kauraaki iaon Tinai n Am Kaotioti. Ni koaua, Ngkoe te Tia Kamatoa, te Tia Ibuobuoki, te Kabanea ni Korakora, te Kabanea n Tituaraoi, te Tia Tangira.

-`Abdu'l-Bahá
-----------------------

